”Nafarroako Hitza”.
Ostirala, 2012ko ekainak 8a.
Kontu kontari.
Aitzol Lasa.
Irakaslea.
“Hodeietan”
zientzia dibulgazioko liburua argitaratu berri du Aitzol Lasa matematikariak.
Orain, buru-belarri dabil tesian, baina halako liburu gehiago idatzi nahi ditu
luze gabe.
“Elhuyarren moduko
taldeei esker da loraldian zientzia dibulgazioa”.
Naiara Elola. Iruñea.
Matematika irakaslea da Aitzol Lasa (Barañain, 1978) NUP
Nafarroako Unibertsitate Publikoan. Denbora batez, Elhuyarren aritu da lanean
zientzia dibulgazioko erreportaje eta albisteak idazten. Bide horretatik
jarraituz, zientzia narrazioko Hodeietan liburua kaleratu berri du,
iragan urtean CAF-Elhuyar saria irabazteagatik aukera hori sortuta. Igandean,
12:00etan aurkeztuko du Iruñeko Gaztelu plazako liburu azokan.
Matematikaria zara ofizioz, eta idaztea da zure afizioa. Bi sari jaso dituzu idazle gisa; horrek bidea erraztu dizu?
Lehenengo saria 2009an eman zidaten; nahiko sari txikia
zen. Barañain Hiria literatur lehiaketaren barruan zenbait kategoria daude, eta
horietako bat Aipa ditzagun emakumeak zen. Irakasle gisa udan denbora
libre dezente izaten dudanez, saiakera bat idazteko aprobetxatu nuen, eta sari
hori irabazi nuen. Baina idazteko zaletasuna Elhuyarren lanean hasi nintzenean
sortu zitzaidan. Elhuyar Zientzia eta Teknika aldizkarirako artikuluak
idazten nituen. Horrez gain, Euskadi Irratiko Norteko ferrokarrila
saioan kolaboratzen nuen, eta ETB1eko Teknopolis saioan erredaktore gisa
aritzen nintzen.
Barañaingo saria txikia zela esan duzu. Sariketa garrantzitsuetan ere garaile izan zara.
Bai, Barañaingo saria txikia zen, baina CAF-Elhuyar saria
oso handia dela esan dezaket, eta niretzat oso pozgarria izan da. Jendeak uste
du Elhuyarren bi sari eman dizkidatela, baina bakarra da. Gauza da iaz eman
zidatela saria liburuaren proiektuagatik. Sari horrek ahalbidetu du Hodeietan
liburua idaztea.
Saria liburua publikatzea zen?
Hori da, liburuaren proiektuagatik saritu ninduten, eta
saria liburua idatzi eta argitaratzea izan da. Zientziak eta letrek badirudi
elkarren aurka egiten dutela, ezin direla biak gustuko izan. Topiko hori
haustea izan da xedeetako bat. Asmoa gaztetxoentzako zientzia dibulgazioa egitea
zen. Ezinbestekoa zen istorioa freskoa eta nerabeen interesekoa izatea. Zer
hobe horretarako maitasun istorio bat baino?
Maitasun istorio baten bitartez azaldu
dituzu zientziaren sekretuak?
Bi pertsonaia nagusi dira, Hodei eta Estibalitz. Hodeik Estibalitz
seduzitu nahi du. Baina hura letretakoa da, eta neska, berriz, zientzietakoa.
Gustuko neskarekin ibili nahiko badu, zientzien munduan murgildu beharko du.
Esan liteke zientzia dibulgazioa modan
dagoela?
Jendeari kalean galdetuz gero Redes saioa ikusi
duen, erantzungo du inoiz ikusi duela edo gustukoa duela. Horrek erakusten du
badagoela horrelako gorakada bat. Baina gorakada hori lortu da zientziaren
dibulgazioan lanean aritzen direnen lanari esker. Hau ez da egun batetik
bestera gertatu. Besteak beste, Elhuyarren moduko taldeei esker da loraldian
zientzia dibulgazioa.
Hodeietan liburuaren harira pare bat anekdota
gertatu zaizkizu.
Bai, horrela da. Hodeietan liburua editatzen ari
ginenean, Sonia Fernandez Vidalen Quantic love izeneko liburua argitaratu
zuten. Hain zuzen ere, maitasun istorio bat oinarri hartuta egiten du kasu
honetan fisika kuantikoaren dibulgazioa. Pentsatu nuen aurreratu egin
zitzaidala, ideia bera zelako: Maitasun istorio bat erabiltzea zientziarekin
lotura duen gai bat garatzeko.
Beste anekdota bat da Donostiako Physics Centerren orain
sei hilabeteko proiektu bat garatzeko jende bila dabiltzala. Bildu nahi dituzte
zientzialariak eta idazleak. Asmoa da, alde batetik, ikustea idazleek zer
ekarpen egin ahal duten zientzia dibulgazioaren alor horretan. Bestetik, jakin
nahi dute zientziak eta zientziaren jakintzak zer-nolako ekarpena egin
diezaiokeen literaturari.
Gero eta gertuago daude zientzia eta
literatura?
Nik uste bi eremuen arteko distantzia murrizten ari dela.
Gizarte tekniko-teknologikoan bizi gara. Nobela batean zientzia gaiak lantzea
gauza normaltzat jo behar dugu. Orain, ausartuko nintzateke esatera genero gisa
jaiotzen ari den zientzia-narrazio generoa literaturan integratuko dela. Gero
eta ohikoagoa bihurtuko da zientzia gaiak lantzen dituzten liburuak
plazaratzea.
Ezagutzen eremuen banaketak badu
zerikusirik fenomeno horretan?
Bai. Gaur egun, gizartea egituratzen ari den modura,
behartuta gaude asko jakitera hainbat alorretan. Garrantzitsua da denetarik
pixka bat jakitea. Hori beharrezkoa da, eta beharrezkoagoa izango da hemendik
aurrera.
Fenomeno horretan zerikusirik badu
zientzia dibulgazioan asmatu izanak?
Alde batetik, argi dago zientziari buruz idazteko jakin
beharra dagoela zeri buruz idazten ari den. Bestela, arrisku handia dago huts
larriak egiteko. Kazetaritzan askotan gertatzen da. Kazetariak behartuta daude
askotan oso ongi menderatzen ez dituzten gaien inguruan idaztera. Horregatik
gertatzen dira hanka sartzeak. Literatura honek duen arazoa hori da. Kontzeptu
zientifiko bat gaizki interpretatuz gero, gezurra esaten da. Fenomeno
zientifikoak edo fisikoak zailak eta konplexuak dira. Beraz, konplexutasun hori
sinplifikatzen denean, egia ez den zerbait helarazten da. Idaztean okerren bat
egiteko arriskua beti hor dago, baina beste generoetan baino presenteago izan
behar da gai zientifikoak lantzean.
Zure etorkizuneko proiektua? Momentu honetan, tesia. Matematikaren
irakaskuntzan programa informatikoen egitekoaz ari naiz tesian.
Zientzia dibulgazioaren eremuan, zein
liburu gomendatuko zenuke? Simon Singh idazlea atsegin dut. Matematika dibulgazioari
buruz liburu asko egin ditu, eta nik uste benetan gomendagarria dela haren
lana.